فرحة

بتدور عالفرحة؟ الفرحة هتلاقيها فعيون ولد من عيلة بسيطة نازل يجيب لبس جديد, يمكن في عروسة متلخبطة,عايزة يومها يبقي احلي عيد

في فخر ام وهي شايفة ابنها بيتخرج, او يمكن فرحة اتنين متخانقين لما واحد فيهم ييجي يسلم و يهرج

هتلاقيها في فرحة النجاح و دخول الجامعة , فرحة لما ماما تفوت لما اعمل نفسي مش سامعة 

بس عارف هتلاقي اكبر فارحة فين؟ بين بيوت ناس علي اد حالها اه بس عارفين الضحكة ومقدرين تمنها

فرحة بمكالمة لثواني اه فرقت ,فرحة لما محاولة فاشلة من غير مقدمات تلاقيها نجحت

طب تقول ايه علي فرحة واحد راجع بلده ليلة العيد و اللمة كملت ,يمكن فرحة كلمة صغيرة بس ضبطت
هتلاقي فرحة في ساعة مغربية مع صوت فيروز ,او يمكن في ملامح وقسمات وش راجل عجوز
  هتشوف الفرحة بالمطر عالكورنيش ,هتلاقيها علي وش اول واحد في طابور العيش
حلاوة فرحة خروجة مش مترتبة في حتة جديدة, و يا سلام علي فرحة لما العربية تطلع من حادثة سليمة
فرحة اول مرة نروح مع بابا المسجد, زي اول فرحة لما حفظنا التشهد
موجودة الفرحة باول عيدية في العيد الكبير و اكيد هتلاقيها في الانتخة مع اخواتك بعد الاكل عالسرير
يمكن فرحة لمة عالسفرة لما الاكل اتمسح و فرحة اول رمضان لما اخيرا الفانوس اتفتح
دور عالفرحة اكيد هتلاقيها, عشان كل لحظة بتروح مش هتيجي بعديها ...